oraec1093

Digital edition of oraec1093 (for metadata and credits check oraec1093)

mḏꜣ,t jri̯.t m ꜣbd 2 pr(,t) ꜥrq,y ḫft mḥ wḏꜣ,t m ꜣbd 2 pr(,t) ꜥrq,y

ḏd-mdw jn Wsjr [...] mꜣꜥ-ḫrw

ḫꜥi̯ Sḫm wbn(.w) 〈m〉 ꜣḫ,t

ḫꜥi̯ Jtm,w ḥr sṯj jꜣd,t =f ꜣḫ,w wbn(.w) m p,t

ḥw,t-bnbn m ḥꜥꜥ(w,t)

jm,j-tw =sn twt(.w) mj-qd =sn

ḫrw nhm m-ẖnw kꜣ{r}jw

hnw pẖr(.w) m dꜣ,t

sn-tꜣ m rʾ n Jtm,w Ḥr,w-ꜣḫ,tj

wḏ,t ḥm =f n psḏ,t šms,w n.w ḥm =f

wꜣḏ ḥm =f ḥr ⸮nk? ky-ḏd jri̯(.t) kꜣ(,t) wḏꜣ,t

m =ṯn ḥꜥ =j rḏi̯ n =f nrjw ꜥ.w,t =j nb(.t) swꜣḏ.(t)n =sn

pri̯ =f rʾ =f

ḥm =f jw ꜣḫ,t =f ḥtp =s ḥr s,t =s ḥr ḥm =f wnw,t twy n.t grḥ,w mḥ(.t) wnw,t 4.t tꜣ nfr(.w) m ꜣbd 2 pr,t ꜥrq,y

jw ḥm n wḏꜣ,t m-bꜣḥ-ꜥ-n psḏ,t

wbn ḥm =f mj zp-tp(,j)

jw wḏꜣ〈,t〉 m tp =f

Rꜥ,w Jtm,w wḏꜣ,t Šw Gbb Wsjr Swtj Ḥr,w Mntj Bꜥḥ Rꜥ,w r-nḥḥ Ḏḥwtj nꜥjw ḏ,t Nw,t ꜣs,t Nb,t-ḥw,t Ḥw,t-Ḥr,w Nḫt Mr,t Mꜣꜥ,t Jnp(,w) tꜣ msi̯ ḏ,t bꜣ Ḥꜣ,t-mḥy,t Rꜥ,w

ḥsb.ntw wḏꜣ,t m-bꜣḥ nb tꜣ pn

ꜥḥꜥ,n =s mḥ.tw ḥtp.tw

wn.jn nn n nṯr.pl m ḥꜥꜥ(w,t) ={ṯn} m hrw pn

ḏr,t =sn ẖr =sn!!

ꜥḥꜥ,n jri̯ ḥ(ꜣ)b n nṯr nb ḏd =sn

hꜣy n =ṯ

ḥkn,w m Rꜥ,w

sqdi̯ jz,t.y wjꜣ

sḫr ꜥꜣpp

hꜣy n =ṯ

ḥkn,w n{.t} Rꜥ,w sḫpr.jw Ḫprj

hꜣy n =ṯ

ḥkn,w m Rꜥ,w

ḥꜥꜥ(w,t) jm =f

dr ḫfti̯.pl =f

hꜣy n =ṯ

ḥkn,w m Rꜥ,w

dr tp.pl n ms,pl-bdš(,t)

jꜣ,wj n =ṯ

ḥkn,w n Wsjr [...] mꜣꜥ-ḫrw

ḏd-mdw ḥr wḏꜣ,t n.t ḫsbḏ mꜣꜥ.t 〈ḥ〉mꜣg(,t) rʾ-pw swꜥb.tw m nbw

wdnw n =s (j)ḫ,t-nb,t nfr(.t) wꜥb(.t) m-bꜣḥ =s ḫft Rꜥ,w ḏi̯ =f sw m ꜣbd 2 pr(,t) ꜥrq,y ḥnꜥ jri̯.t k.t wḏꜣ,t n.t ḫnm(,t) rḏi̯(.tj) n z r ꜥ,t.pl nb(.t) mri̯.wt ={j}f wnn(⸮.tj?)

ḏd rʾ pn m wjꜣ-n-Rꜥ,w jw sṯꜣ.tw =f ḥnꜥ nn n nṯr.pl

wnn =f mj wꜥ,w jm =sn

jw sṯz.tw =f m ẖr,t-nṯr

jr ḏd rʾ pn mj,tt pꜣ wdnw m mḥ wḏꜣ,t wḏꜣ,t

ḫꜣw,t 4 n Rꜥ,w Jtm,w ḫꜣw,t 4 n wḏꜣ,t ḫꜣw,t 4 n nn n nṯr.pl

n,tj ḥr wꜥ,w nb jm =sn

tʾ nfr tʾ-ḥḏ 5 dgꜣ.pl tʾ-ḥḏ 5 šꜥy-bjꜣ 5 snṯr dnj(,t) dq(r).pl dnj(,t) jwf ꜣšr