oraec213

Digital edition of oraec213 (for metadata and credits check oraec213)

ḏd-mdw jn Wsjr [...] mꜣꜥ-ḫrw

j:nḏ-ḥr =ṯn nṯr.pl jm,j.w wsḫ,t-n,t-Mꜣꜥ,tj jw,tj grg m ẖ,t =sn ꜥnḫ.w m mꜣꜥ,t m Jwn,w sꜥm.w ḥꜣ,tj.pl =sn m-bꜣḥ Ḥr,w jm,j-jtn≡f

nḥm =ṯn wj m-ꜥ Bꜣby ꜥnḫ m bsk.pl wr.pl hrw pfj n jp ꜥꜣ

m =ṯn Wsjr [...] mꜣꜥ-ḫrw jwi̯(.w) rḫ(.w) ṯn

nn ḫbn,t =f ḫw,w =f

nn jri̯ =tw (j)ḫ,t-nb(,t) r =f

ꜥnḫ =f m mꜣꜥ,t

sꜥm =f m mꜣꜥ,t

jw jri̯ =f nḏm-jb

jri̯.n =f ḏd.t r(m){r}〈ṯ〉.pl hru̯(.t) nṯr.pl ḥr =s

jw sḥtp.n =f nṯr m mrr!{.tw} =f

jw rḏi̯.n =f tʾ n ḥqr mw n jbi̯ ḥbs n ḥꜣw,w

rḏi̯.n =f mẖn,t n jw,w

jw jri̯.n =f ḥtp-nṯr n nṯr.pl pr-ḫrw n ꜣḫ.w

nḥm =ṯn sw rf =ṯn

ḫwi̯ sw rf =ṯn

ḥr-n,tj nn smj =ṯn r =f m-bꜣḥ nb sꜥḥ.w

ḥr-n,tt rʾ =f wꜥb(.w) ꜥ.wj =f wꜥb(.w)

ḏd n =f jy,tw zp-2 m-ḥtp jn mꜣꜣ.w sw

ḥr-n,tt sḏm.n Wsjr [...] mꜣꜥ-ḫrw md,t pwy ꜥꜣ ḏd.n ꜥꜣ ḥnꜥ mjw m pr,w pḏ rʾ

mtr =f m mꜣꜣ =f m ḥr =f ḥꜣ =f

ḏi̯.n =f dnj,wt

jw mꜣꜣ.n Wsjr [...] mꜣꜥ-ḫrw pš jšd.pl r-gs =f m-ẖnw Rʾ-sṯꜣ,w

ntf sm,w(j) n nṯr.pl rḫ.pl m ⸮nʾ,t.pl? =sn

jy.n =f di̯ r s(j)ꜥr mtr mꜣꜥ,t

jw =f wꜥb(.w) r rḏi̯.t ꜣwsw r ꜥḥꜥ.t =f m-ẖnw jqr,pl

j qꜣi̯ ḥr jꜣ,t =f nb ꜣtf.pl jri̯ rn =f m nb ṯꜣw nḥm =k Wsjr [...] mꜣꜥ-ḫrw m-ꜥ nꜣy =k jpw,tj.pl m dr.yw ky-ḏd ṯms sḫpr.ypl ⸮jꜣr,y? ky-ḏd jꜣṯ jw,t ṯꜣm m ḥr

〈ḥr-〉n,tj jrj Wsjr [...] mꜣꜥ-ḫrw mꜣꜥ,t n nb-mꜣꜥ,t

jw =f wꜥb(.w)

ḥꜣ,tj =f wꜥb(.w)

ḥꜣ,t =f m ꜥb,w

pḥ,wt =f m twr

ḥr-jb =f m šd,yt mꜣꜥ.t

nn ꜥ,t jm =f m jzf,t

wꜥb Wsjr [...] mꜣꜥ-ḫrw m šd,yt twy rsj ḥtp,t mḥ,t(j) n sḫ,t zꜣ{z}〈n〉ḥm.pl wꜥb wꜣḏ,tj.pl jm =s m wnw,t twy 4,nw.t n.t grḥ 8,nw.t n.t hrw ḥnꜥ zẖꜣ jb.pl nṯr.pl m-ḫt swꜣ =sn m grḥ,w m hrw

{ḏi̯.t}〈jmi̯〉 jwi̯ =f j.n =sn nṯr.pl

Wsjr [...] mꜣꜥ-ḫrw nm tr j.n =sn r =f

ptr rn =k ḫr =sn n =f

jnk Wsjr [...] mꜣꜥ-ḫrw rd ẖr mḥy(,t)

jm,j bꜣq =f rn n Wsjr [...] mꜣꜥ-ḫrw

swꜣ.{r}〈n〉 =k ḥr m j.n =sn r =f

swꜣ.n =j ḥr ⸮sḫ,w{t}.pl? mḥ,t(j.t) bꜣq

ptr mꜣꜣ.n =k jm

ḫnd pw ḥnꜥ mꜣs,t

ptr j.n{n} =k n =sn

mꜣꜣ.n =j ky-ḏd .n =k hꜣy m nw tꜣ,{du}〈pl〉-f(n)ḫ,pl

p(t)r rf rḏi̯.tn =sn n =k

bs pw n sḏ,t ḥnꜥ wꜣḏ n ṯḥn(,t)

ptr rf jri̯.n =k

jw qrs.n =j ḥr wḏb pwy n š n mꜥꜣ(,t) m tr n wḫꜣ

ptr gmi̯.n =k ḥr =f wḏb pw n š n mꜥꜣ(,t)

wꜣs p{n}〈w〉 n ds

j{w}n-jw šdi̯ =k sw ḫrw

jw šdi̯.n Wsjr [...] mꜣꜥ-ḫrw

ptr rf p(ꜣ) wꜣs pn n ds

rḏi̯-ṯꜣw rn =f

ptr rf jri̯.n =k r =f p(ꜣ) bs n sḏ,t ḥnꜥ p(ꜣ) wꜣḏ n ṯḥn(,t) m-ḫt q{r}js =k sw

hꜣy Wsjr [...] mꜣꜥ-ḫrw ḥr =s

jw šdi̯.n =f sw

ꜥḫm.n =f sḏ,t

jw sḏ.n =f wꜣḏ

qmꜣ.n =f rʾ-pw ky-ḏd r psg r psg

ꜥq r wsḫ,t-n,t-mꜣꜥ,tj

jw =k rḫ n{.w}

nn ḏi̯! =j ꜥq =k ḥr =j j.n bnš n sbꜣ pn nn-js ḏd.n =k rn =j

tḫw m b(w)-mꜣꜥ rn =k

nn ḏi̯! =j ꜥq =k ḥr =j j.n ꜥdy wnmi̯ n sbꜣ pn nn-js ḏd.n =k rn =j

ḥn,tjw mꜣꜥ,t rn =k

nn ḏi̯ =j ꜥq =k ḥr =j j.n ꜥdy,t jꜣbi̯ n sbꜣ pn nn-js ḏd.n =k rn =j

ḥn,tj n jp,t jb.pl rn =k

nn ḏi̯ =j šꜣjs =k ḥr =j j.n zꜣt n sbꜣ pn nn-js ḏd.n =k rn =j

jwn n Gbb rn =k

nn wn =j n =k j.n q{r}j,t nn-js ḏd.n =k rn =j

ꜣw ky-ḏd ms n Mw,t rn =ṯ

nn wn =j ⸢n⸣ =k j.n ẖnw q{r}j,t

nn ḏi̯ =j pri̯ =s j.n šꜣjs n sbꜣ pn nn-js ḏd.n =k rn =j

ꜥnḫ(,t) n.t Sbk nb b(ꜣ)ẖ rn =k

nn s{n}šm =k (w)j nn zni̯ =k wj j.n ꜥꜣ nn-js ḏd.n =k rn =j

q(ꜣ)b,t n.t Šw rḏi̯.n =f sw m zꜣ n Wsjr rn =k

nn ḏi̯ =j swꜣ =k ḥr =n j.n jpd.pl nn-js ḏd.n =k rn =n

nḫn,pl 〈R〉nw,t rn =ṯn

jw =k rḫ(.tj) n

nn ḫnd =k ḥr =j 〈j.n〉 zꜣt n wsḫ,t tn

ḥr-m rf

ḥr-n,tj nn rḫ =k rn n rd.du =k ḫnd =k ḥr =j jm =sn

zbzb Mn,w rn n wꜥr,t =j wnmi̯(.t)

wnp,t n.t Nb,t-ḥw,t rn n wꜥr,t =j jꜣbi̯(.t)

ḫnd r =k ḥr =⸢n!!⸣

⸢jw⸣ =⸢k⸣ ⸢rḫ(.tj)⸣ [...]

nn ⸢smj⸣ =⸢j⸣ ṯw j.n jr,j-ꜥꜣ nn-js ḏd.n =k rn =j

sjꜣ.w jb.pl ḏꜥr ẖ,t.pl rn =k

smjw =(j) ṯw rf n m

nṯr jm,j wnw,t =f

ptr sw nṯr m wnw,t ḏd.n =k

sṯni̯.w Tꜣ,du

ptr sṯni̯.w Tꜣ,du

m =k wj j.n Ḏḥwtj

jy Wsjr [...] mꜣꜥ-ḫrw r smjw

jm =j ky-ḏd jw =j wꜥb.kw m ḫw,w nb

jw =j wꜥb(.kw)

ḫwj =k wj m-ꜥ šnṯ,t n.t jm,j.pl-hrw =sn

nn tw =j m-m =sn

smjw =(j) ṯw rf m

smjw wj n hꜣy,t =f m sḏ,t jnb =f m jꜥrꜥ,t.pl ꜥnḫ.pl zꜣt.pl =f m nwi̯

m =k ṯw smjw.tw

jw tʾ =k m wḏꜣ,t ḥ(n)q,t =k m wḏꜣ,t

jw pri̯-r-ḫrw =k m wḏꜣ,t

mꜣꜥ-ḫrw Wsjr [...] mꜣꜥ-ḫrw ḏ,t