oraec295

Digital edition of oraec295 (for metadata and credits check oraec295)

rʾ n jni̯.t {m}mẖn,t m ẖr-nṯr jn [...] mꜣꜥ-ḫrw

j jnn!.yw {m}mẖn,t ḥr ṯz{,wt} pwy qsn jni̯ n =j mẖn,t

ṯz n =j ꜥqꜣ

m-ḥtp zp-2 mj zp-2 ḫꜣmm zp-2

jy.n =j r mꜣ jti̯ =j Wsjr

j nb jns,j sḫm m ꜣw,t-jb j nb (j)gp ṯꜣy sqd,wt j sqdd! ḥr ṯz pwy n ꜥꜣpp j ṯz tp.pl smn wsr,t.pl m pri̯.t m nzp,w j jr,j mẖn,t štꜣ.t zꜣw.t ꜥꜣpp jni̯ n =j mẖn,t

ṯz n =j ꜥqꜣ r pri̯.t jm =f tꜣ pn qsn ḫr sḫd.pl sꜣ.pl jm =f ḥr ḥr.pl =sn

n gmi̯.n =sn ṯzi̯ =sn st

ḥnswꜣ ns n Rꜥ,w jndb,w sšmi̯.w tꜣ mn Gb(b) m ḥmw.pl =sn

sḫm pw wn jtn ḥr,j-tp dšr,w jni̯ wj

m jwi̯ wj

jy ꜣḫ sn =j

wḏꜣ r bw rḫ.n =k jm

ḏd rn =j j.n mnj,t

nb,t-Tꜣ,du m kꜣr{j} rn =ṯ

ḏd rn =j j.n ḫrp,w

ḫnd stj,w rn =k

ḏd rn =j j.n ḥꜣ,tt

ḥnzk,t mnj.t Jnp,w rn =ṯ m kꜣ,t wt

ḏd rn =j j.n wḏ(,t).pl

ꜥꜣ.w,t pw n.t ẖr-nṯr

ḏd rn =j j.n ḥp,t.pl

Ꜣkr,w rn =k

ḏd rn =j j.n ḫt-ṯꜣw

jni̯ wr,t m-ḫt wꜣi̯ =s rn =k

ḏd rn =j j.n ꜥ,t n-ẖr

jꜣ,t pw n.t Wpi̯-wꜣ,tpl rn =k

ḏd rn =j j.n ḏꜣḏꜣ

šbb n (J)m{t}〈s〉,tj rn =k

ḏd rn =j j.n tꜣy,t

Nw,t rn =ṯ

ḏd rn =j j.n šd.w-ꜥr.pl

jri̯.tw =ṯn m mskꜣ n Mr-wr m db.w,t n.t Stš

ḏd rn =j j.n wsr.w

ḏbꜥ.pl pw n Ḥr,w sms,w

ḏd rn =j j.n mḏꜣb,t

ḏr,t pw n(.t) Ꜣs,t ḥr pnq znf m jr,t-Ḥr,w

ḏd rn =j j.n wg.pl =s j.n jm,j.w ẖ,t =s

Jms,tj Ḥpy Dwꜣ-mw,t≡f Qbḥ-sn,pl≡f Ḥꜣq,w Jri̯ m-ꜥwꜣ Mꜣꜣ-n-jti̯≡f rn≡f-ḏs≡f

ḏd rn =j j.n smꜣ,t =f

ḫnt,j.t ḥzp.w rn =ṯ

ḏd rn =j j.n jbꜣ,yt

Mr,t rn =ṯ

ḏd rn =j j.n ḥmw

ꜥqꜣ rn =k

j(ꜣ)ḫ.w m mw tš mw rn ḏnḥ =k

ḏd rn =j j.n dp,t

wꜥr,t pw n.t Ꜣs,t šꜥ.t Rꜥ,w m ḏꜣi̯.t ꜥ r jnn!.t znf r sk,tt

ḏd rn =j j.n nf,w

wy rn =k

ḏd rn =j j.n ṯꜣw ḏr fꜣi̯ =k jm =j

mḥ,yt jwi̯.t m Jtm,w r fnḏ n Ḫnt,j-jmn,tjw rn =k

ḏd rn =j j.n jtr,w ḏr ḏꜣi̯.t =k jm =j

ptr{j} =sn rn =k

ḏd rn =j j.n ꜥḫm,t

sḥtm.t ꜣw-ꜥ m wꜥb,t rn =ṯ

ḏd rn =j j.n zꜣ.w,t ḏr ḫnd =k ḥr =j

fnḏ p,t pri̯.t wt.w jm,j.t sḫ,t-jꜣr,w prr!{.t} ḥꜥi̯.yt jm =f

ḏd.t ḫft =sn

j:nḏ-ḥr =ṯn nfr.w kꜣ.w nb,w-(j)ḫ,t wnn.yw r nḥḥ ḥn,tj ={ṯn} ḏ,t

wbꜣ =j r =ṯn

ḏi̯! =ṯn n =j dbḥ(,t)-ḥtp r-gs =j

mdwi̯ =j jm =f

šns =j qfn(.w)

s,t =j wsḫ.t(j) m-bꜣḥ nṯr-ꜥꜣ

jw =j rḫ.kw nṯr =ṯn pwy ꜥꜣ ḏḏ! =ṯn ḏfꜣ =ṯn r fnḏ =f

Tkm rn =f

jw =f wbꜣ =f m ꜣḫ,t jꜣb,tj.t n(.t) p,t

jw =f ḫpi̯ =f m jmn,tt

Tkm rwj =f rwj =j

dr.t(w) =f ḥr msq,t

nn sḫm sbj.w m jwf pn

jw tʾ =j m Pi̯ ḥ(n)q,t =j m Dp,w

jw n =j ꜣw,t =ṯn n.t hrw pn

ꜣw,t =j pw jt btj

ꜣw,t =j pw ꜥntj,w ḥbs.w ꜣpd.w snṯr

ꜣw,t =j pw ꜥnḫ-wḏꜣ-snb

ꜣw,t =j pw pri̯.t m hrw m ḫpr,w nb mri̯.y =j pri̯.t jm =f m sḫ,t-jꜣr,w

ḏd rʾ pn jw =f pri̯ =f m sḫ,t-jꜣr,w

jw ḏi̯!.tw n =f šns ds pzn sṯꜣ,t-ꜣḥ,t.pl m jt btj n mḥ 9

jn šms,w-Ḥr,w ꜣzḫ n =f st

wšꜥ.ḫr =f m nn n jt btj

zjn.ḫr =f ḥꜥ =f jm

wn.ḫr ḥꜥ =f mj nn n nṯr.pl

jw =f pri̯ =f m sḫ,t-jꜣr,w m ḫpr,w nb mri̯.y =f pri̯.t jm =f