Digital edition of oraec571 (for metadata and credits check oraec571)
ḥm-nṯr-tp,j-n-Jmn-Rꜥw-nswt-nṯr,w Rꜥw-msi̯-sw-nḫt(,w) ḏd n nḥs,j ṯꜣ,y-mḥ,yt Ꜥny-twn nḥs,j ṯꜣ,y-mḥ,yt Sn,wt nḥs,j ṯꜣ,y-mḥ,yt Tr-bdydy nꜣ nḥs,.plj ṯꜣ,y pḏ,wt n tꜣ ḫꜣs,t Jkrjt m ꜥnḫ-wḏꜣ-s(nb) m ḥz(w),t Jmn-Rꜥw nswt-nṯr,pl rꜥw-nb
ḥnꜥ-ḏd r-n,tj sḏm =j r-ḏd tw=tn ḥn =tw m pḏ,t jrm nꜣ rmṯ.pl n nꜣ qwr n jꜥ,y-nbw n pr Jmn-Rꜥw nswt-nṯr,pl r-ḫt =j pr nb
ḏi̯ pꜣ ḫpš ṯnr n pr-ꜥꜣ ꜥnḫ-wḏꜣ-snb pꜣy =j nb nꜣ ḫr,w.pl n šꜣs,w n Mw-qd n,tj ḥmsi̯ m Qḥqḥ sp,t pꜣ ym n pꜣ jwtn r-ḏr jw m Jmn-Rꜥw nswt-nṯr,pl pꜣj nṯr-ꜥꜣ nb n tꜣ nb j:šmi̯ jrm =tn r ḏi̯.t n =tn dr,t
nhm mj nꜣ zp-2 n nꜣ nfr(,w) qn,w j:jri̯ Jmn-Rꜥw nswt-nṯr,pl n pr-ꜥꜣ ꜥnḫ-wḏꜣ-snb pꜣy =f šrj jw =f ḏi̯.t nꜣ ḫr,w.pl n šꜣs,w j:wn jy.t r thi̯ pꜣ tꜣ n Km,t n pꜣ jwtn
ḥzi̯.y tw=tn Jmn-Rꜥw nswt-nṯr,pl ḥzi̯.y tw=tn Mnṯ,w ḥzi̯.y tw kꜣ n pr-ꜥꜣ ꜥnḫ-wḏꜣ-snb pꜣy =tn nb m-ḏr rwi̯ =tn nꜣ ḫr,w.pl n šꜣs,w j:wn jy.t r thi̯ pꜣ tꜣ n Km,t jw =tn ḥꜣq =w
wḏ =j pꜣj mḏꜣ,w ḏi̯ =j jwt =f n =tn ẖr,j mj,tj n tꜣj ḫr.t.pl n,tj tw=j ꜥḥꜥ.k ꜥrꜥr st r ḏi̯.t jni̯.tw =st n =tn
wnn tꜣy =j šꜥ,t spr r =tn jw =tn smn =tn j:m tꜣ dmj,t bꜣk nbw j:jri̯.t tꜣj ḫr,t.pl j:ḏi̯ =j jni̯.tw n =tn r-ḥꜣ,t pꜣy =j pꜣ šms(,w) jnk spr r =tn
mtw =tn ḏi̯.t ḥr =tn n nꜣ rmṯ.pl n pꜣj qwr n jꜥi̯-nbw n pr Jmn r-ḫt =j r ḏi̯.t jni̯.t =w pꜣj nbw n Jmn-Rꜥw nswt-nṯr,pl pꜣy =tn nb r tm.t ḏi̯.t thi̯ st nꜣ šꜣs,w
mtw =tn tm.t jy r thi̯ m tꜣ n Km,t
jr pꜣ n,tj jw =tn ꜣṯi̯ j:m =f jw =tn hꜣb n =j ḏi̯ =j jni̯.tw =f n =tn
mtw =tn jri̯ bꜣk,j.pl nfr.pl n Jmn-Rꜥw nswt-nṯr,pl pr-ꜥꜣ ꜥnḫ-wḏꜣ-snb pꜣy =tn nb mtw =tn ptr nꜣ