oraec890

Digital edition of oraec890 (for metadata and credits check oraec890)

ḥꜣ,t-ꜥ(,w)-m rʾ.pl n.w pri̯(.t) m hrw sṯz[,pl] sꜣḫ.w m ẖr,t-nṯr

ḏd =tw hrw q{r}js

ꜥq m-ḫt pri̯.t jn Wsjr [...] mꜣꜥ-ḫrw

j Wsjr kꜣ-jmn,tt j.n Ḏḥw,tj nswt n nḥḥ jnk nṯr-ꜥꜣ r-gs dp,t-nṯr

ꜥḥꜣ.n =j ḥr =k

jnk wꜥ,w m nn n nṯr.pl ḏꜣḏꜣ,t smꜣꜥ-ḫrw Wsjr r ḫfti̯.pl =f hrw pwy n wḏꜥ-md,t

n-wj wnḏw.w(,t) =k Wsjr

jnk wꜥ,w m nn n nṯr.pl ms.w Nw,t smꜣ ḫfti̯.pl n.w wrḏ,w-jb ḫnj sbj.pl ḥr =s!!

n-wj wnḏw.w(,t) =k Ḥr,w

ꜥḥꜣ.n =j ḥr =k

zbj.n =j ḥr rn =k

jnk Ḏḥwtj smꜣꜥ-ḫrw Ḥr,w r ḫfti̯.pl =f hrw pwy n wḏꜥ-md,t m ḥw,t-sr wr m Jwn,w

jnk ḏd(,wj) zꜣ ḏd(,wj)

jwr.w =j m Ḏd,w

msi̯.w =j m Ḏd,w{t}

wnn =j r-ḥnꜥ ḥꜣ,y(t)du Wsjr j(ꜣ)kb.w(t) ḥr Wsjr m jdb,pl-rḫt

smꜣꜥ-ḫrw Wsjr r ḫfti̯.pl =f {ḫsf}〈ḫrw-fj〉 sw Rꜥ,w n Ḏḥw,tj

smꜣꜥ-ḫrw Wsjr r ḫfti̯.pl =f {ḫsf}〈ḫrw-fj〉 jri̯.t =j n Ḏḥw,tj

wnn =j r-ḥnꜥ Ḥr,w hrw pfj n ḥbs tštš r wn ṯpḥ,t r yꜥi̯ jb n wrḏ,w-jb sštꜣ štꜣ,pl m Rʾ-sṯꜣ,w

wnn =j r-ḥnꜥ Ḥr,w m nḏ qꜥḥ pwy jꜣb(,j) n Wsjr jm,j {Z}Ḫm

pri̯ =(j) ꜥq =(j) m jꜣ,t-nsrsr

dr sbj.pl ky-ḏd nšnj.pl m {Z}Ḫm

wnn =j r-ḥnꜥ Ḥr,w hrw ḥ(ꜣ)b n Wsjr-Wnn-nfr,w mꜣꜥ-ḫrw jri̯.y ꜥꜣb,t n{.t} Rꜥ,w hrw sn,wt dnj(,t) m Jwn,w

jnk wꜥb m Ḏd,w sbq m Ꜣbḏ,w sqꜣi̯ jm,j qꜣ,yt

jnk ḥm-nṯr m Ꜣbḏ,w hrw n qꜣ,w tꜣ

jnk mꜣꜣ sštꜣ m Rʾ-sṯꜣ,w

jnk šdi̯ ḥ(ꜣ)b(,t) n Bꜣ-nb-Ḏd,t

jnk sm m jr,jpl =f

jnk wr-(ḫrp-)ḥmw(,t) rḏi̯{.t} ḥny ḥr mfḫ

jnk šzp ḫbs-tꜣ m ḥw,t-nn-nsw,t

j stkn(.pl) bꜣ.pl mnḫ.pl m pr,w Wsjr stkn =ṯn bꜣ n Wsjr [...] mꜣꜥ-ḫrw ḥnꜥ =ṯn r pr,w Wsjr

mꜣꜣ =f mj mꜣꜣ =ṯn

sḏm =f mj sḏm =ṯn

ꜥḥꜥ =f mj ꜥḥꜥ =ṯn

ḥmsi̯ =f mj ḥmsi̯ =ṯn

j ḏi̯ tʾ ḥ(n)q,t n bꜣ.pl mnḫ.pl m pr,w Wsjr ḏi̯ =ṯn tʾ ḥ(n)q,t r-tr n Wsjr [...] mꜣꜥ-ḫrw ḥnꜥ =ṯn

j wn(.pl) wꜣ,t.pl j wpi̯(.pl) mṯn.w n bꜣ.pl mnḫ.pl m pr,w Wsjr wn =ṯn wꜣ,t.pl wpi̯ =ṯn mṯn.w n Wsjr [...] mꜣꜥ-ḫrw ḥnꜥ =ṯn

ꜥq =f m rʾ pwy m pr,w Wsjr

ꜥq =f m dndn

pri̯ =f m-ḥtp Wsjr [...] mꜣꜥ-ḫrw

nn ḫsf.tw =f

nn šnꜥ.tw =f

ꜥq =f ḥzi̯.tw

pri̯ =f mri̯.tw

smꜣꜥ-ḫrw =f

jri̯ =t(w) wḏ.t =f m pr,w Wsjr

šmi̯ =f md,t =f ḥnꜥ =ṯn

šmi̯ Wsjr [...] mꜣꜥ-ḫrw r jmn,tt m-ḥtp

nn gmi̯.tw wn =f m mḫꜣ,yt

nn rḏi̯{.t} ky-ḏd rḫ

sjp.kwj m rʾ.pl ꜥšꜣ{,t}.pl

sꜥḥꜥ bꜣ =k r-ḫft-ḥr

gmi̯.tw =f wḏꜣ(.w) rʾ tp tꜣ

m =k wj m-bꜣḥ =k nb nṯr.pl

pḥ.n =j spꜣ,t mꜣꜥ,tdu

ḫꜥi̯.kw m nṯr ꜥnḫ

psḏ.kw m psḏ,t jm,j.w p,t

wnn =j mj wꜥ,w jm =ṯn

sṯz nmt,t =(j) m H̱r,j-ꜥḥꜣ

mꜣꜣ =j sqd,wt Sꜣḥ šps ḏꜣi̯ nw,w

nn šnꜥ wj r mꜣn! =j nb.w-dꜣ,t ky-ḏd psḏ,t

ḫnm =(j) ḏf(ꜣ) n psḏ,t

ḥmsi̯ =(j) r-ḥnꜥ =sn

njs n =j ẖr,j-ḥ(ꜣ)b,t hn

sḏm.n =j dbḥ,w(t)-ḥtp

dg{ꜣ}s.n =j nšm(,t)

nn šnꜥ.tw bꜣ =j ḥnꜥ nb =f

j:nḏ-ḥr =k ḫnt,j-jmn,tt Wsjr ḥr(,j)-jb Tꜣ-wr

ḏi̯! =k hꜣi̯ =j m-ḥtp r jmn,tt

šzp wj nb.w tꜣ-ḏsr

ḏd =sn n =j jꜣ,w zp-2 m-ḥtp

jri̯ =sn n =j s,t r-gs wr m ḏꜣḏꜣ,t

šzp wj ḫnm,t.j r-tr.pl

pri̯ =j m-bꜣḥ Wnn-nfr,w mꜣꜥ-ḫrw

šms =j Ḥr,w m Rʾ-sṯꜣ,w Wsjr m Ḏd,w

jri̯ r ḏḏ! jb =j m b(w) nb mrr! kꜣ =j jm

jr rḫ mḏꜣ,t tn ḥr-tp tꜣ jw =f (ḥr) jri̯ =s m zẖꜣ,w ḥr qrs(,w) rʾ-pw jw =f pri̯ =f m rꜥ,w-nb mrr! =f ḥnꜥ ꜥq r ḥw,t =f nn šnꜥ.tw =f

jw ḏi̯! =tw n =f tʾ ḥ(n)q,t wr n jwf ḥr ḫꜣw,t n.t Rꜥ,w

sꜣḥ =f m ꜣḥ,t.pl m sḫ,t-jꜣr,w

ḏi̯! =tw n =f jt btj jm

ḫr wnn =f wꜣḏ(.w) mj wnn =f ḥr-tp tꜣ