oraec811

Digital edition of oraec811 (for metadata and credits check oraec811)

dwꜣ Rꜥw-Ḥqꜣ-ꜣḫ,tj-ḥꜥi̯-m-ꜣḫ,t M-rn≡f-m-jtj-Rꜥw-jy-m-Jtn ḏi̯ ꜥnḫ ḏ,t nḥḥ jn nzw ꜥnḫ-m-Mꜣꜥ,t nb-tꜣ.du Nfr-ḫpr,pl-Rꜥw-wꜥ-n-Rꜥw zꜣ-Rꜥw ꜥnḫ-m-Mꜣꜥ,t nb-ḫꜥ,pl Ꜣḫ-n-Jtn ꜥꜣ-m-ꜥḥꜥ(,w)≡f ḏi̯ ꜥnḫ ḏ,t nḥḥ

ḫꜥꜥ =k ⸢nfr⸣ pꜣ Jtn ꜥnḫ nb-nḥḥ jw =k tḥn.ṯ ꜥn.tj wsr.ṯ

mrw,t =k wr.ṯ ꜥꜣ.tj

stw,t =k twk ={sw}〈sn〉 n ḥr-nb.pl

jnm =k wbḫ ḥr sꜥnḫ ḥꜣ,tj.pl

mḥ.n =k Tꜣ,du m mrw,t =k

pꜣ nṯr šps qd-sw-ḏs≡f jri̯ tꜣ nb qmꜣ n,tj ḥr =f m r(m)ṯ mnmn,t ꜥw,t nb šn.pl nb rd ḥr gbb,t ꜥnḫ =sn wb〈n〉 =k n =sn

ntk m(ʾw),t jt(j) n jri̯.y =k

jr,t.du =sn wbn =k ptr =sn jm =k

sḥḏ.n stw,t =k tꜣ r-ḏr =f

jb nb ḥꜥi̯.w n mꜣꜣ =k jw =k ḫꜥi̯.ṯ m nb =sn

ḥtp{t} =k m ꜣḫ,t jmn,tt n.t p,t sḏr =sn mj sḫr n,tj m(w)t

jw tp.pl =sn ḥbs.w fnḏ.pl ḏbꜣ.w r ḫpr(.t) wbn =k dwꜣ.t m ꜣḫ,t jꜣb,tt n.t p,t

ꜥ.wj =sn m jꜣ,w n kꜣ =k

sꜥnḫ.n =k ḥꜣ,tj.pl m nfr,pl =k

ꜥnḫ =tw ḏi̯.n =k stw,t =k

tꜣ nb m ḥꜣb

ḥs.w šmꜥ.pl nhm m rš,wt m wsḫ,t n ḥw,t-bnbn ḥw,t-nṯr nb m Ꜣḫ,t-〈Jtn〉 s,t-Mꜣꜥ,t hru̯.y.n =k jm =s ḥw ḏfꜣ ḥtp.w m-ẖnw =s

zꜣ =k wꜥb.w ḥr jri̯.t ḥzz,t =k

pꜣ Jtn ꜥnḫ m ḫꜥꜥ.y =f jri̯.y =k nb ḥr jb(ꜣ) n-ḥr =k

zꜣ =k šps ⸢ḥꜥꜥ.w⸣ ⸢jb⸣ =f m rš,wt

pꜣ Jtn ꜥnḫ ⸢hru̯.w⸣ m p,t rꜥw-nb msi̯ =f zꜣ =f šps Wꜥ-n-Rꜥw mj qd =f nn jri̯.t ꜣb zꜣ-Rꜥw wṯz nfr,pl =f Nfr-ḫpr,pl-Rꜥw-wꜥ-n-Rꜥw

jnk zꜣ =k ꜣḫ n =k wṯz rn =k

pḥ,tj =k ⸢wsr⸣ =k mn.w{j} m jb =j

ntk Jtn ꜥnḫ nḥḥ tj,t =k jw jri̯.y.n =k p,t wꜣ.t r wbn jm =s r mꜣꜣ jri̯.y =k nb jw =k wꜥi̯.tj jw ḥḥ.pl n ꜥnḫ jm =k r sꜥnḫ =sn

ṯꜣw n ꜥnḫ r fnd mꜣꜣ stw,t =k

wnn ḥrr,t nb ꜥnḫ.t rd ḥr jtn srd n wbn =k

tḫ =sn n ḥr =k

j(ꜣ)w,t nb ḥr ṯbhn