oraec108

Digital edition of oraec108 (for metadata and credits check oraec108)

ḥꜣ,t-ꜥ-m pẖr,t n(,j).t tm rḏi̯ hꜣi̯ bn,tj

bꜥbꜥ st m snf n(,j) jwi̯(.t) ḥzmn =s m dp jr =f

sjn ẖ,t =s mn,t.du =sj jm

n ḫpr.n gs,w r =s

k.t n(,j).t tm rḏi̯ 〈ḫpr〉 gs,w r rwn,t

mjs,t n(,j).t mn,t s(w)šr.tj

ẖꜣ.w ḥr ḥsꜣ n(,j) ꜥwꜣ,yt

ḏi̯ n s,t r mnd.w.pl =s r ẖ,t =s r ꜥ,t.pl =s nb.t ḫpr.t gs,w r =s

k.t pẖr,t n(,j).t mnd mḥr =f

ḥtm,t 1 wdd n(,j) jḥ 1 ḥs-n-ꜥff 1 stj 1

jri̯ m (j)ḫ,t wꜥ.t

gs mnd jm r hrw 4

šn,t n(,j).t mnd

mnd pw nn-n mn.n ꜣs,t m ꜣḫ-bj,t m msi̯.t =s Šw ḥnꜥ Tfn,t

jri̯.t.n =s n =sn šn,t =sn m jꜣr m ṯꜣ n(,j) snb m bkꜣ,t n(,j).t sw,t m šnj n(,j) jb,t =s jni̯.yt.pl r dr s,t-ꜥ m(w)t m(w)t,t ḥmw,t-rʾ

jri̯ m swš ḥr jꜣb(,j)

rḏi̯ r s,t-ꜥ n(,j) m(w)t m(w)t,t

m jri̯ wsš,t

m jri̯ wšꜥ,w

m jri̯ snf

zꜣw ḫpr ḥꜣtj r ḥnmm,t

ḏd-mdw ḥr jꜣr ḥr ṯꜣ n(,j) snb bkꜣ,t n(,j).t sw,t šnj n(,j) dp jb,t =s

〈swš〉 ḥr jꜣb(,j)

jri̯ m ṯs,t 7

ḏi̯ r =s

pẖr,t n(,j).t dr st,t m jd,t

g(ꜣ)b,t n(,j).t ḫt-ds

s(w)šr ḥr {ḥ}tꜣ〈ḥ〉,t n(,j).t ḥ(n)q,t jqr.t

rḏi̯ ḥr npḥ,w =s kns =s

k.t n(,j).t wnm.t m jd,t sḫpr.t bn,wt m šd =s

bnj wꜣḏ 1 ḥkn,w 1 jnr n(,j) rʾ mw 〈1〉

ẖꜣ.w ḥr mw

sḏr n jꜣd,t

wḏḥ m jwf =s

k.t

bnj wꜣḏ 1 ꜣs n(,j) rr,j 1 qsn,tj 1 mw 〈1〉

sḏr n jꜣd,t

wḏḥ m jwf =s

k.t jrr.t.pl r mḥr,t qsn.t

jrt,t jḥ psi̯ 1 ḏrḏ n(,j) šnd,t 1 qsn,tj 1

nḏ m (j)ḫ,t wꜥ.t

sḏr n jꜣd,t

wḏḥ m jwf =s

sqb,w pw

k.t

bnj wꜣḏ 1 mrḥ,t ḥḏ.t 1 ḏrḏ n(,j) šnd,t 1 mrḥ,t 1 mw 〈1〉

mj,t(j)t

k.t n(,j).t ḫpr.t mḥr,t m sp(,t).du šd =s

ḥḏ,pl 1 stj 1 nḥd,t 1 sntr 1 ḏrḏ n(,j) šnd,t 1 jmꜣḫ n(,j) jḥ 1 ḥnj-tꜣ 1 mw 1

jri̯ m (j)ḫ,t wꜥ.t

wḏḥ m jwf =s

k.t n(,j).t qmj,t m jd,t ḫpr bn,tt m šd =s

ḫpr-wr 1 ẖꜣ.w ḥr mw sntr 1 qsn,tj 1

wḏḥ m jwf =s

k.t

wꜥḥ rʾ-8 bnj wꜣḏ rʾ-8 ḏrḏ n(,j) šnd,t rʾ-8 qsn,tj rʾ-32 mw 1/64 jrt,t (j)ꜥꜣ

sḏr n jꜣd,t

wḏḥ m jwf =s

k.t n(,j).t sqbb jd,t dr tꜣ,w.pl =s

mm nḏ gj,w nḏ ḥr mrḥ,t

wḏḥ m jwf =s

sꜣq pw n(,j) jd,t

k.t

šmšm,t

nḏ ḥr bj,t

wḏḥ m jwf =s

sꜣ〈q〉.w pw

k.t

sntr mꜣt,t

nḏ snꜥꜥ ḥr jrt,t jḥ

skp.w m ḥbs.pl

wḏḥ m jwf =s

sꜣq.w pw

k.t n(,j).t sꜣq jd,t

ḫpr-wr 1 bj,t 1 mw n(,j).w ḏꜣr,t 1 jrt,t 1

ꜥtḫ

rḏi̯ ⸮〈__〉? ⸮〈__〉?

wḏḥ m jwf =s

k.t

mw n(,j).w mstj

wḏḥ m jwf =s

k.t

mw n(,j).w nšꜣ

wḏḥ m jwf =s

k.t

mw n(,j).w qtqt.w.pl

wḏḥ m jwf =s

k.t

mw n(,j).w njꜣjꜣ

wḏḥ m jwf =s

pẖr,t n(,j).t jtḥ snf n(,j) s,t

ḥḏ,w 1 jrp 1

jri̯ m (j)ḫ,t wꜥ.t

wḏḥ m jwf =s

k.t

ḏrḏ n(,j) šnd,t 1 bꜣq 1 mrḥ,t šw 1 pꜣḫ-srj,t 1 pr,t tjḥwj 1 bj,t 1

wḏḥ m jwf =s

k.t

bsbs rʾ-8 bj,t rʾ-8 mhwt gs 1/64 ḥ(n)q,t nḏm.t 1/64

wḏḥ m jwf =s r hrw 4

jr ḫꜣi̯ =k s,t pꜣu̯ n =s hꜣi̯.t (j)ḫ,t mj mw pḥ,wj jr,j mj snf qfn ḏd.ḫr =k r =s

ꜣẖꜥ,t pw ḥr jd,t =s

jri̯.ḫr =k n =s qꜣḥ n(,j) jṯi̯.w mw

ẖꜣ.w ḥr bj,t ḥr ms~ḏw~mw,t

gs kꜣp n(,j) pꜣq,t jm

rḏi̯ m jwf =s r hrw 4

jr ḫꜣi̯ =k s,t mn =s wꜣ,t wꜥ.t n(,j).t kns =s ḏd.ḫr =k r =s

tm mꜣꜥ,w =s pw jn ḥzmn =s

jr m-ḫt rḏi̯.n =f dp =f jri̯.ḫr =k n =s ḥḏ,w qnqn šb,t ws,t n(,j).t ꜥš

wt kns ḥr =s

jr ḫꜣi̯ =k s,t jṯi̯.n =s rnp,t.pl ꜥšꜣ(.wt).pl n jyj.n n =s ḥzmn =s jw =s bši̯ =s (j)ḫ,t mj ḥbb,t jw ẖ,t =s mj n,t.t ẖr sḏ,t grḥ =s m-ḫt bši̯ =s ḏd.ḫr =k r =s

ꜥḫ,t pw n(,j).t snf ḥr jd,t =s ḫft šni̯.t =s sḏr.t

jri̯.ḫr =k n =s pr,t wꜥn rʾ-32 tpnn rʾ-64 sntr rʾ-64 wꜥḥ rʾ-16

rḏi̯.ḫr =k jrt,t jḥ 1/4 ḥr sḏ,t ḥnꜥ tbn n(,j) ḫnd

rḏi̯ ḥr nn-n jrt,t

zwr jm r hrw 4

k.t pẖr,t n(,j).t sft,w.pl n(,j).w tꜣ,w.pl ḥr jd,t

(ꜣ)js n(,j) j(w)ꜣ 1 qsn,tj 1 mrḥ,t 1

jri̯ m (j)ḫ,t wꜥ.t

wḏḥ m jwf =s

k.t jrr.t.pl r ꜥq.t njḏw

pr,t.pl ḫnš.pl šw.w.pl

nḏ snꜥꜥ

rḏi̯ ḥr =f

jni̯.t jrt,t n mnꜥ,t šdi̯.t ẖrd

jꜣ,t n(,j).t ꜥḥꜣ

snwḫ ḥr mrḥ,t

gs jꜣ,t =s jm

k.t

ḫnm,t n(,j).t jt ꜥwꜣ.t

jri̯ ꜥ n(,j) ḫ,t =s m ḫsꜣ.w.pl

wnm.tw jn s,t

rd.du =sj m njnj

ky sjꜣ ẖrd hrw mss.tw =f

jr ḏd =f ny ꜥnḫ =f pw

jr ḏd =f mbj m(w)t =f pw

ky sjꜣ

jr sḏm.tw ḫrw =f ((n(,j)⁝⁝)) ꜥši̯ m(w)t =f pw

jr ḏi̯ =f ḥr =f r ẖr,w m(w)t =f pw gr