oraec139

Digital edition of oraec139 (for metadata and credits check oraec139)

gp p,t jḥy sbꜣ.pl nmnm pḏ,t.pl sdꜣ qs.pl ꜣkr.w gr r =sn gnm.w mꜣ.n =sn Wnjs ḫꜥ bꜣ m nṯr ꜥnḫ m jt(j).pl =f wšb m mʾw,t.pl =f

Wnjs pw nb zꜣb,wt ḫm.n mʾw,t =f rn =f

jw šps,w Wnjs m p,t jw wsr =f m ꜣḫ,t mj (J)tm(,w) jt(j) =f msi̯ sw

jw msi̯.n =f sw

wsr sw r =f

jw kꜣ.pl Wnjs ḥꜣ =f

jw ḥms.w,t =f ẖr rd.du =f

jw nṯr.pl =f tp =f

jw jꜥr,t.pl =f m wp,t =f

jw sšm,wt Wnjs m ḥꜣ,t =f ptr.t bꜣ ꜣḫ.t nṯb =s

jw wsr.pl Wnjs ḥr mk.t =f

Wnjs pj kꜣ p,t nhd m jb =f ꜥnḫ m ḫpr(,w) n(,j) nṯr nb wnm wzm.w =sn jwi̯.w mḥ ẖ,t =sn m ḥkꜣ.w m jw-nsjsj

Wnjs pj ꜥpr jꜥb ꜣḫ.pl =f

jw Wnjs ḫꜥi̯ m wr pw nb jm(,j).w-s,t-ꜥ

ḥmsi̯ =f sꜣ =f jr Gbb

Wnjs pj wḏꜥ mdw =f ḥnꜥ jmn rn =f hrw pw n(,j) rḫs sms,w

Wnjs p nb ḥtp,t ṯꜣz ꜥqꜣ jri̯ ꜣw,t =f ḏs =f

Wnjs pj wnm rmṯ ꜥnḫ m nṯr.pl nb jn,w.pl ḫꜣꜥ wp(w),t.pl

jn Jḫmꜥ-wp,t,pl-jm(,j)-kḥꜣ,w spḥ sn n Wnjs

jn ḏsr-tp zꜣꜣ n =f sn ḫsf n =f sn

jn ḥr(,j)-ṯr,wt qꜣs n =f sn

jn ḫnz,w mds nb.w ḏꜣd =f sn n Wnjs šdi̯ =f n =f jm.t ẖ,t =sn

wp(w),t(j) pw hꜣb.w =f r ḫsf

jn Šzm,w rḫs =f sn n Wnjs fss n =f jḫ,t jm =sn m ktj,t.pl =f mšr,wt

Wnjs pj wnm ḥkꜣ =sn j:ꜥm ꜣḫ(,w) =sn

jw wr.pl =sn n jš,t =f dwꜣ,t

jw ḥr(,j).w-jb =sn n mšr,wt =f

jw šrr.pl =sn n jš,t =f ḫꜣw

jw jꜣ(w).pl =sn jꜣw,t.pl =sn n kꜣp,t.pl =f

jn ꜥꜣ mḥ,t(j).w p,t wd.w n =f sḏ,t r wḥꜣ.w,tpl ẖr.t =sn m ḫpš.pl n(,j).w sms(,w) =sn

jw pẖr jm(,j).w p,t n Wnjs šsr.t{t} n =f ktj,t.pl m rd.pl n(,j).w ḥʾm,t.pl =sn

jw dbn.n =f p,t.du tm.tj

jw pẖr.n =f jdb.wdu

Wnjs pj sḫm-wr sḫm m sḫm.pl

Wnjs pj ꜥšm ꜥšm ꜥšm.w wr

gmi̯.y =f m wꜣ,t =f wnm =f n =f sw mwmw

jw mk,t Wnjs m-ḥꜣ,t sꜥḥ.w nb.w jm(,j).w ꜣḫ,t

Wnjs pj nṯr sms r sms,w

jw pẖr n =f ḫꜣ.pl

jw wdn n =f šn,t.pl

jw rḏi̯ n =f ꜥ m sḫm-wr jn Sꜣḥ jt(j) nṯr.pl

jw wḥm.n Wnjs ḫꜥ,w m p,t

j(w) =f sbn m nb ꜣḫ,t

jw ḥsb.n =f ṯꜣz.pl bqs,w.pl

jw jṯi̯.n =f ḥꜣ,t(j).pl nṯr.pl

jw wnm.n =f dšr,t dšr,t

jw ꜥm.n =f wꜣḏ,t wꜣḏ,t

wšb Wnjs m zmꜣ.pl sꜣꜣ.w

ḥtp =f m ꜥnḫ m ḥꜣ,t(j).pl ḥkꜣ.w =sn jsṯ

fjw Wnjs nsb =f sbš.w jm(,j).w dšr,t

j(w) =f wꜣḫi̯ =f

jw ḥkꜣ =sn m ẖ,t =f

n nḥmm sꜥḥ.w Wnjs m-ꜥ =f

jw ꜥm.n =f sjꜣ n(,j) nṯr nb

ꜥḥꜥ,w pj n(,j) Wnjs nḥḥ ḏr(,w) =f pj ḏ,t m sꜥḥ =f pn n(,j) Mrr≡f-jrr≡f msḏḏ≡f-n-jri̯,n≡f jm(,j) ḏr,w ꜣḫ,t ḏ,t r nḥḥ

sk bꜣ =sn m ẖ,t Wnjs ꜣḫ(,w) =sn ḫr Wnjs m ḥꜣ(,w) ḫ,t =f r nṯr.pl qrr.t n Wnjs m qs.pl =sn

sk bꜣ =sn ḫr Wnjs šw.w,t =sn m-ꜥ jr(,j).w =sn

jw Wnjs m nn ḫꜥi̯ ḫꜥi̯ j:mn j:mn

n sḫm jri̯.w jr.wt m ḫbs s,t-jb Wnjs m ꜥnḫ.w m tꜣ pn ḏ,t r nḥḥ