oraec211

Digital edition of oraec211 (for metadata and credits check oraec211)

ḏ(d)-mdw

j:ḫr wr ḥr gs =f nmnm jm(,j) Ndj,t

ṯzi̯ tp =f jn Rꜥw

bw,t =f qdd msḏi̯ =f bꜣg,j

j(w)f n(,j) Ttj pn m ḥwꜣ m jmk (j)mi̯ ḏwi̯ sṯ(j) =k

n swꜣꜣ rd =k n šꜣss nmt =k

n ḫnd =k ḥr ḥwꜣ,t (W)sr(,w)

sꜣḥ =k p,t mr Sꜣḥ spd bꜣ =k mr Spd,t

j:bꜣ =k bꜣ.tj wꜣš =k wꜣš.tj

ꜥḥꜥ bꜣ =k mm nṯr.pl m Ḥr,w ḥr(,j)-jb Jrw

ḫpr šꜥ,t =k r jb nṯr.pl mr n,t tp.t bj,t(j) mr mjz,wt tp.t nzw mr ḥnk,t tp.t mnṯ,w.pl

nḏri̯ =k jr ꜥ Jḫm.w-sk

n ḥtm qs.pl =k n zwn.w j(w)f =k Ttj n ḥri̯ ꜥ,t.pl =k jr =k n ṯwt js wꜥ m nṯr.pl

ḫsfi̯ n =k Pj ḫdi̯ n =k Nḫn

ḏsw n =k Smn,tt swḥ n =k (j)m(,j)-ḫnt.pl

jy m ḥtp(,w) jr =k Ttj n jt(j) =k jy m ḥtp(,w) jr =k n Rꜥw

wn n =k ꜥꜣ.du p,t jzn n =k ꜥꜣ.du sḥd,w

hꜣi̯.n Ttj m zꜣb-šmꜥ(,wj) Jnp,w js ḥr(,j)-ẖ,t≡f Wpj,w js ḫnt(,j) Jwn,w

rḏi̯.n n =k ḥwn,t wr.t ḥr.t-jb Jwn,w ꜥ.w =s jr =k n-jw,t mʾw,t =k m rmṯ.pl msi̯.tj ṯw n-jw,t jt(j) =k m rmṯ.pl msi̯.j ṯw

mʾw,t =k smꜣ,t-wr,t ḥr.t-jb Nḫb ḥḏ.t ꜥfn,t ꜣwi̯.t š(w),t.j nḫꜣḫꜣ.t mnḏ.du

snq =s ṯw n wḏḥ =s ṯw

j:dr ṯw ḥr gs =k jꜣb(,j) ḥmsi̯ ḥr gs =k jmn(,j) Ttj

j:mn s,t.pl =k jm.t nṯr.pl twꜣ Rꜥw ḥr =k m rmn =f

sṯ(j) =k m sṯ(j) =sn fd,t =k m fd,t psḏ,t.du

j:ḫꜥ =k Ttj m (j)ḫ,t-ḥꜣ,t j:mḥ ḏr,t =k m Ḥr,w-s ḫfꜥ ḫfꜥ =k ḥr ḥḏ

ꜥḥꜥ Ttj m-ḫnt jtr,t.du wḏꜥ-mdw nṯr.pl

n(,j) ṯw nḫḫ.w pẖr.w Rꜥw tp(,j).pl-ꜥ,w(j) nṯr-dwꜣ(,wj)

msi̯ =k jr ꜣbd.pl =k mj jꜥḥ

twꜣ Rꜥw ḥr =k m ꜣḫ,t Ttj

š(m)s ṯw Jḫm.w-sk,j

ꜥbꜣ ṯw jr jwi̯ Rꜥw Ttj

wꜥb =k pri̯ =k n Rꜥw

n šwi̯ p,t jm =k Ttj ḏ,t