oraec229

Digital edition of oraec229 (for metadata and credits check oraec229)

ḥꜣ,t-ꜥ-m mḏꜣ,t n.t jri̯.t jꜣw m rnp

jni̯.ḫr =tw ḥmꜣ,yt r-ꜥꜣ,t-wr,t mj,tt ẖꜣr 2

qnqn.ḫr =tw

rḏi̯ n šw

jr m-ḫt šww ḥr-qd ḫr =tw ḏn =tw mj ḏn jt

ḫꜣḫꜣ.ḫr =tw r spp n pr,t jr,j

jr ḫpr.t.pl nb.t jm ḫr =tw ḫꜣi̯ =tw ḥnꜥ rḏi̯.t nqr.tw sḫr.pl n ⸮psḏn? m nqr.w

ḫꜣi̯ mj,tt ḫpr.t.pl nb.t m nꜣ-n pr,t

jri̯ m sp 2 wꜥ m nꜣ-n pr,t ky m sḫr.pl

jri̯ wꜥ mj wꜥ

smn.ḫr =tw jri̯ m (j)ḫ,t wꜥ.t ḥr mw

jri̯ m šd,t gn.t

rḏi̯.ḫr =tw m sbḫ mꜣ(w) ḥr ḫ,t

pfs ḥr-qd r mnḫ

rḫ =k pfss =sn ḥr ꜥḫḫ mw jr,j ḥr šww =sn r wnn mj sḫr.pl šw nn nqw,t r =s

šdi̯.ḫr =tw

jr jsk st qb(.w) rḏi̯.ḫr =tw r ꜥnḏ,w r jꜥi̯.t st ḥr jtr,w

jꜥi̯.w.ḫr =tw r mnḫ

rḫ =tw jꜥꜥ =sn ḥr dp =tw dp,t nꜣ-n mw n,tj m pꜣ ꜥnḏ,w nn dḥr nb r =s

rḏi̯.ḫr =tw n šw

sš ḥr ḥbs n rḫt(j)

jr jst st šw.w nḏ.ḫr =tw ḥr bnw,t swgm

smn.ḫr =tw ḥr mw

jri̯ mj šd,t gn.t

rḏi̯.ḫr =tw m sbḫ ḥr ḫ,t

pfs r mnḫ

rḫ =tw pfss =〈sn〉 ḥr prr pns,t.pl n.t mrḥ〈.t〉 jm

wnn z ḥr pnq mrḥ,t pri̯.t jm m bꜣd,t

rḏi̯ m hnw r-sꜣ ꜣd =f m sjn

snꜥꜥ swmt ꜣd =f

pnq nn-n mrḥ,t

ḏi̯ ḥr kꜣp,t m gs n ḥr,j hnw pn

jr m-ḫt rḏi̯.ḫr =tw r ḥn,w n ꜥꜣ,t

wrḥ z jm

dr ḫnt pw m tp

jr sk.tw ḥꜥ,pl jm prr snfr n jnm

dr nḏꜥ,w jmš,t nb.t tnj nb srf,t nb.t wnn.t m ḥꜥ,pl

šs ḥḥ n sp