oraec114

Digital edition of oraec114 (for metadata and credits check oraec114)

ḥꜣ,t-ꜥ,w-m sṯz,w.pl sḫꜣ,w pri̯.t m hrw hꜣi̯.t m ẖr-nṯr ꜣḫ 〈m〉 jmn,t nfr.t wnn m šms,w n Wsjr ḥtp m šb,w n Wnn-nfr,w pri̯(.t) m hrw jri̯.t-ḫpr,w m ḫpr,w nb mri̯.y =f ḫpr jm =f ḥꜥb zn,t ḥmsi̯(.t) m zḥ pri̯.t m bꜣ ꜥnḫ.y jn [...] mꜣꜥ-ḫrw nb-jmꜣḫ m-ḫt mnj =f

jw ꜣḫ n jrr! st tp tꜣ

ḏd-mdw ḫpr md,t n nb-tm,w

jnk Jtm,w m wnn =j wꜥi̯.k(w) m Nw,w

jnk Rꜥ,w m ḫꜥ,w =f m šꜣꜥ ḥqꜣ,t jri̯.tn =f

ptr rf sw

Rꜥ,w pw m šꜣꜥ ḥqꜣ,t jri̯.tn =f

Rꜥ,w pw ḫꜥi̯.w m nsw,t m wnn

n ḫpr.t sṯz,w-Šw

jw =f ḥr qꜣꜣ n jm,j.w-Ḫmn,w

jnk nṯr-ꜥꜣ ḫpr-ḏs≡f

ptr rf sw

nṯr-ꜥꜣ ḫpr-ḏs≡f mw pw

Nw,w pw jti̯-nṯr,pl

ky-ḏd Rꜥ,w pw m qmꜣ rn.w =f nb-psḏ,t

ptr rf sw

Rꜥ,w pw qmꜣ rn.w n ꜥ,t.pl =f ḫpr nn pw n nṯr.pl jm,j.w-ḫt =f jw,tj ḫsf =f m nṯr.pl

ptr rf sw

Jtm,w pw jm,j-jtn≡f

ky-ḏd Rꜥ,w pw wbn =f m ꜣḫ,t jꜣb,t(j).t n.t p,t

jnk sf

jw =j rḫ.kw dwꜣ,w

ptr rf sw

jr sf Wsjr pw

jr dwꜣ Rꜥ,w pw hrw pf n ḥtm ḫft(,j.pl) n.w nb-r-ḏr jm =f

ḥnꜥ sḥqꜣ =tw zꜣ =f Ḥr,w

ky-ḏd hrw pw n jw≡n-mn,wjn{d}

dhn.tw qrs pw n.t Wsjr jn jti̯ =f Rꜥ,w

jri̯.n =tw ꜥḥꜣ nṯr.pl ḫft wḏ =j

ptr [rf] ⸢s⸣w

⸢jmn,t⸣ ⸢pw⸣ nw

Rꜥ,w hꜣi̯ nṯr nb r =s

ꜥḥꜥ,n ꜥḥꜣ.n =f sj ḥr =s

jw =j rḫ.kw nṯr pwy ꜥꜣ n,tj jm =⸢s⸣

[ptr] [rf] ⸢sw⸣

Wsjr pw

ky-ḏd ḥkn,w-Rꜥ,w rn =f

bꜣ pw n Rꜥ,w

nk =f jm =f

[...] [bn]⸢,w⸣ pwy ꜥꜣ n,tj m Jwn,w jr,j sjp n n,tj wnn

pt{r}j rf sw

Wsjr pw

jr n,t(j).t ⸢wnn⸣ ⸢sṯꜣ.t⸣ =⸢f⸣ ⸢p⸣w

ky-ḏd ẖꜣ,t =f pw

ky-ḏd nḥḥ pw ḥnꜥ ḏ,t

jr nḥḥ hrw pw

jr ḏ,t grḥ pw

jnk J{m,j}〈ꜣḥ〉sj m pr,t =f

jw rḏi̯ n =j šw,t.du =j m tp =j

ptr rf sw

jr Jꜣḥsj Ḥr,w pw nḏ-ḥr-jti̯≡f

jr pr,t =f ms.pl =f

jr šw,t.du =fj m tp =f šmi̯.t Ꜣs,t ḥnꜥ Nb,t-ḥw,t rḏi̯ =sn st m tp =f m wnn =sn m ḏr,t.j

jsk sw ḥr mn tp =f

ky-ḏd jꜥr,t.j pw wr〈.tj〉 ꜥꜣ.tj jm,j.t ḥꜣ,t jti̯ =f Jtm,w

ky-ḏd jr,t.du =fj pw šw,t.y m tp =f

wnn =j m tꜣ

jy.n =j m nʾ,t =j

ptr rf st

ꜣḫ,t pw n.t jti̯ =j

dr jw =j

ḫsr =j ḏw,t =j

ptr rf sw

šꜥd =tw ẖpꜣ pw n{pꜣ}

sḥri̯.w ḏw,t nb.t jr,j.t =f

ptr rf sw

wꜥb.n =j m zš.wj wr.wj ꜥꜣ n.tj Nn-nsw,t hrw ꜥꜣb,t rḫ,yt n nṯr pwy ꜥꜣ n,tj jm =s

ptr rf st

ḥḥ rn n wꜥ

wꜣḏ-wr rn n ky

jr gr,t nṯr pwy ꜥꜣ n,tj jm =s Rꜥ,w pw ḏs =f

šmm! =j ḥr wꜣ,t rḫ =j

tp =j m jw n mꜣꜥ,tj.w

ptr rf st

Rʾ-sṯꜣ,w pw

sbꜣ rsj m N-ꜣjr≡f

sbꜣ mḥ,tj n jꜣ,t Wsjr

jr gr,t jw n mꜣꜥ,tj.w Ꜣbḏ,w pw

ky-ḏd wꜣ,t pw šmi̯.n jti̯ =j Jtm,w ḥr =s ḫft ḏꜣi̯ =f r sḫ,t-jꜣr,w

spr =j r jw n ꜣḫ,tj.w

pri̯ =j m sbꜣ ḏsr

ptr rf st

sḫ,t-jꜣr,w pw msi̯.t ḏfꜣ.w n nṯr.pl ḥꜣ kꜣ{r}j.pl

jr gr,t sbꜣ pw ḏsr sbꜣ pw sṯz,w Šw

jr gr,t sbꜣ mḥ,tj sbꜣ pw n dꜣ,t

ky-ḏd ꜥꜣ.du-rʾ.y pw ḏꜣi̯.w jti̯ =j Jtm,w ḥr =s ḫft ḏꜣi̯ =f r ꜣḫ,t jꜣb,tj n.t p,t

jm,j.w{m}-bꜣḥ jm jmi̯ n =j ꜥ.wj =ṯn

jnk pw ḫpr jm =ṯn

pt{r}j [rf] [s]t

znf pw [h]ꜣi̯ m ḥnn n Rꜥ,w m wꜣi̯ =f r jri̯.t šꜥ,t =f ḏs =f

ꜥḥꜥ,n ḫpr m nṯr.pl jm,j.w{m}-bꜣḥ Rꜥ,w

[Ḥw] pw ḥnꜥ Sjꜣ wnn m-ḫt jti̯ Jtm,w m-ẖr,t-hrw n.t rꜥ,w-nb

j [...] [jr],t m-ḫt hꜣq =s hrw pwy n ꜥḥꜣ Rḥ,wj

pt{r}j rf sw

hrw pw n ꜥḥꜣ.n Ḥr,w jm =f ḥnꜥ Stš

m wdi̯ =f sṯꜣ,w m ḥr n Ḥr,w

m jṯi̯.t Ḥr,w ẖr,w n Stš

jn gr,t Ḏḥwtj jri̯ nn m ḏbꜥ.pl =f

jw ṯzi̯.n =j šnj m wḏꜣ,t m tr =s nšnj

ptr rf sw

jr,t pw wnmi̯.t n.t Rꜥ,w m nšny =s r =f m-ḫt{f} hꜣb =f sj

jn gr,t Ḏḥwtj ṯzi̯ šnj jm =s

m jni̯.t =f n =f sj n ꜥnḫ-(w)ḏꜣ-s(nb)

nn bg{ꜣ}s,w =s nb

ky-ḏd wnn jr,t =f pw mr sj m wnn =s ḥr rmi̯.t n sn,nw.t =s

ꜥḥꜥ,n rf Ḏḥwtj r psg =s

jw mꜣꜣ.n =j Rꜥ,w pwy msi̯.y m sf r ḫpd.w n Mḥ(,t)-wr,t

wḏꜣ =j wḏꜣ =s ṯz-pẖr

ptr rf sw

nw pw nwi̯,t n.t p,t

ky-ḏd twt pw n jr,t-Rꜥ,w dwꜣ.w r msi̯.t =f rꜥ,w-nb

jr gr,t Mḥ,t-wr,t wḏꜣ,t pw n.t Rꜥ,w

ḥr-n,tt jnk wꜥ m nw-n jm,j.w-ḫt Ḥr,w mdwi̯.pl ḥr-tp =f mr,y nb =f

ptr rf sw

Jms,tj Ḥpy Dwꜣ-mw,t≡f Qbḥ-sn,pl≡f

j:nḏ-ḥr =ṯn nb.w-mꜣꜥ,t ḏꜣḏꜣ,t ḥꜣ(,j).t Wsjr ḏḏ!.yw šꜥd m jzf,tj.w jm,j.w-ḫt Ḥtp≡s-ḫwi̯≡s

m =ṯn wj jy.kw ḫr =ṯn

dr =ṯn ḏw,t nb.t jr,j.t =j mj nw jri̯.n =ṯn n ꜣḫ.w 7 jpw jm,j.w-šms,w n nb-Spꜣ jri̯.n Jnp,w m s,t =sn hrw pf n mj jr =k (j)m

pt(r) rf st

jr nn n nb.w-mꜣꜥ,t Ḏḥwtj pw ḥnꜥ Jsdz nb-jmn,t

jr ḏꜣḏꜣ,t ḥꜣ,j.t Jms,tj Ḥpy Dwꜣ-mw,t≡f Qbḥ-sn,pl≡f

nꜣ pw n,tj m-sꜣ pꜣ ḫpš m p,t mḥ,tj

jr ḏḏ!.yw šꜥ,t m jzf,tj.w jm,j.w-ḫt Ḥtp≡s-ḫwi̯≡s Sbk.w pw jm,j.w mw

jr Ḥtp≡s-ḫwi̯≡s wḏꜣ,t pw n.t Rꜥ,w

ky-ḏd nsr,t pw

jw =s m-ḫt Wsjr ḥr sꜣm bꜣ.pl n.w ḫftj.w =f

jr gr,t ḏw〈,t〉 nb.t jr,j.t =j jrr!.t [...] m-m nb.w-nḥḥ ḏr hꜣi̯ =f m ẖ,t n.t mw,t =f

jr gr,t ꜣḫ.w ⸢7⸣ [jpw] Jms,tj Ḥpy Dwꜣ-mw,t≡f Qbḥ-sn,pl≡f Mꜣꜣ-n-jti̯≡f H̱r,j-bꜣq≡f Ḥr,w mḫnt,j-jr,tdu

rḏi̯.t st pw jn Jnp,w m zꜣ qrs,t pw n.t Wsjr

ky-ḏd m-sꜣ wꜥb,t n.t Wsjr

ky-ḏd jr ꜣḫ.w 7 jpw Nḏḥḏḥ ꜣqdqd Kꜣ n rḏi̯.n =f nbj =f ḫnt,j hwt,t =f ꜥq-ḥr jm,j wnw,t =f Dšr jr,tdu jm,j ḥw,t jns,j ꜣsb ḥr pri̯ m ḫtḫt Mꜣꜣ m grḥ jni̯.n =f m hrw

jr ḏꜣḏꜣ,t tn N-ꜣjr≡f wr rn =f

jr gr,t hrw pf n mj jr =k n =j ḏd Wsjr pw n Rꜥ,w

mj jr =k

mꜣn! =j ṯw ḫrw-fj sw r jmn,t

jnk bꜣ(,wj)≡fj-ḥr(,j)-jb-ṯꜣ,du≡fj

ptr rf sw

Wsjr pw ꜥq.n =f r Ḏd,w

gmi̯.n =f bꜣ jm n Rꜥ,w

ꜥḥꜥ,n ḥpt.n ky-ky jm

ꜥḥꜥ,n ḫpr m bꜣ,du =f

jr gr,t ṯꜣ.du =fj Ḥr,w pw nḏ-ḥr-jti̯≡f ḥnꜥ Ḥr,w mḫnti̯-jr,tdu

ky-ḏd jr bꜣ(,wj)≡fj-ḥr(,j)-jb-ṯꜣ,du≡fj bꜣ pw n Rꜥ,w

bꜣ pw n Wsjr

bꜣ pw jm,j Šw

bꜣ pw Tfnw,t

bꜣ pw jm,j Ḏd,t

jnk mjw pwy ꜥꜣ psš jšd r-gs =f m Jwn,w grḥ pf n ꜥḥꜣ-ꜥ n jri̯.t zꜣw,t sbj.w hrw pw n ḥtm =tw ḫftj.w =f

jnk nb-r-ḏr jm =f

pt{r}j rf sw

jr mjw pwy ꜥꜣ Rꜥ,w pw ḏs =f

ḏd.n =tw n =f mjw m ḏd.n Sjꜣ r =f

mjw sw m nn jri̯.n =f

ḫpr rn =f pw n mjw

ky-ḏd wnn Šw pw ḥr jri̯.t jm,jt-pr,w n Gbb n Wsjr

jr gr,t psš jšd r-gs =f m Jwn,w wnn ms.w bdš,t pw ḥr smꜣꜥ jri̯.tn =sn

jr grḥ pf n ꜥḥꜣ-ꜥ,w ꜥq =sn pw m jꜣb,tj n.t p,t

ꜥḥꜥ,n ꜥḥꜣ-ꜥ,w ḫpr(.w) m p,t m tꜣ r-ḏr =f

j Rꜥ,w jm,j-swḥ,t≡f psḏ m jtn =f wbn m ꜣḫ,t =f nbi̯ ḥr bjꜣ =f jw,tj sn,nw =f m nṯr.pl sqdd! ḥr sṯz,w-Šw ḏḏ! ṯꜣw m hh n rʾ =f sḥḏ Tꜣ,du m ꜣḫ.w =f nḥm =k [...] m-ꜥ nṯr pw štꜣ jrw wnn =f m rmn.⸢w⸣[j] ⸢m⸣ḫꜣ,t grḥ pf n ḥsb.t ꜥwꜣ(y)

ptr rf sw

jni̯ ꜥ,w =f pw

j⸢r⸣ [grḥ] ⸢p⸣w ḥsb.t ꜥwꜣ(y) grḥ pw 〈n〉 nsr,t n ḫr,yt

ḏḏ! spḥ.w m jzf,tj.w r nm,t =f dn.t bꜣ.pl

ptr rf sw

Šzm,w pw

sj(ꜣ)ṯ,j pw n Wsjr

ky-ḏd Ꜥꜣpp pw wnn =f tp wꜥ,w ẖr mꜣꜥ,t ky ẖr jzf,t

ḏḏ! =f jzf,t n jrr! sj mꜣꜥ,t n jy ẖr =s

ky-ḏd Ḥr,w pw ꜥꜣ ḫnt,j Ḫm

ky-ḏd Ḏḥwtj pw

ky-ḏd Nfr-tm pw zꜣ Bꜣs,tt

ḏꜣḏꜣ,t pw ḫsf.t (j)ḫ,t n ḫft,j.w n.w nb-r-ḏr

nḥm =k wj m-ꜥ nw-n jr,j.pl sṯꜣ.w,t j:mnḥ.yw spd.w ḏbꜥ.pl mr.w ḥsq jm,j.w-ḫt Wsjr

nn sḫm =sn jm =j

nn hꜣi̯ =j r ktw,t.pl =sn

ptr rf sw

Jnp,w Ḥr,w pw mḫnti̯-jr,tdu

ky-ḏd ḏꜣḏꜣ,t pw ḫsf.t (j)ḫ,t n ḫft,j.w n.w nb-r-ḏr

ky-ḏd wr-z(w)n,w pw n šny.w

nn sḫm ds.w =sn m [...] mꜣꜥ-ḫrw

nn hꜣi̯ =j r ktw,t.pl =sn

ḥr-n,tt twj rḫ.kw rn.w =ṯn rḫ.kw rn n mḏd pwy jm,j =sn n pr,w Wsjr sti̯ m jr,t =f n mꜣꜣ.ntw =f dbn p,t m hh n rʾ =f smj Ḥꜥpi̯ n mꜣꜣ.ntw =f

jnk wḏꜣ tp tꜣ ḫr Rꜥ,w mnj nfr.t ḫr Wsjr

nn ḫpr ꜥꜣb,t =ṯn ={j} jm =j n nꜣ n ḥr,j.w ꜥḫ.w =sn

ḥr-n,tt wj m šms,w n nb-r-ḏr r zẖꜣ,pl n Ḫprj

ꜥẖy =j m bjk ꜥꜣ

ggꜣ =j m smn

ski̯ =j nḥḥ mj Nḥb,w-kꜣ,pl

ptr rf sw

nw pw ḥr,j.w ꜥḫ.w =sn

twt pw n jr,t n Rꜥ,w

ḥnꜥ twt pw n jr,t-Ḥr,w

j Rꜥ,w Jtm,w nb ḥw,t-ꜥꜣ,t jty nṯr.pl nb.w nḥm =k [...] mꜣꜥ-ḫrw m-ꜥ nṯr pw n,tj ḥr =f m ṯzm jnḥ.du =fj m r(m)ṯ ky-ḏd jnḥ.du =fj m r(m)ṯ ꜥnḫ =f m ḫr,yt jr,j qꜣb pwy n š n sḏ,t ꜥm ẖꜣ.w,t ḫnp ḥꜣ,t(j).w wdd!.w sṯꜣ,pl n mꜣꜣ.ntw =f

ptr rf sw

ꜥm ḥḥ.pl rn =f

wnn =f m š Wn,t

[jr] gr,t š pwy n sḏ,t pꜣ pw n,tj jm,j-w{n}〈t〉j N-ꜣjr≡f r Šny.w

jr ⸢ḫnd⸣ ⸢nb⸣ ḥr =f sꜣt(.w) ḫr =f n šꜥ{d},t

ky-ḏd mds rn =f

jr,j-ꜥꜣ pw n jmn,t

ky-ḏd ḥr,j zp =f rn =f

j nb-nrw ḥr,j-tp Tꜣ,du nb dšr,w wꜣḏ nm.w,t ꜥnḫ m bsk.w

ptr rf sw

ḥꜣ,tj pw n Wsjr

ntf wnm šꜥ.t nb.t

rḏi̯.y n =f wrr,t ꜣw,t-jb m-ḫnt,j Nn-nsw,t

ptr rf sw

jr rḏi̯ n =f wrr,t ꜣw,t-jb m-ḫnt,j Nn-nsw,t Wsjr pw

wḏḏ.j n =f ḥqꜣ m nṯr.pl hrw pf n zmꜣ,t-Tꜣ,du m-bꜣḥ-ꜥ nb-r-ḏr

ptr rf sw

jr wḏḏ.j ḥqꜣ m nṯr.pl Ḥr,w pw zꜣ ꜣs,t sḥqꜣ.w m s,t jti̯ =f Wsjr

jr hrw pf n zmꜣ,t-Tꜣ,du dmḏ Tꜣ,du pw r qrs Wsjr

bꜣ mnḫ jm,j Nn-nsw,t ḏḏ! kꜣ,pl dr jzf,tj.w sšmi̯.w n =f wꜣ,t nḥḥ

ptr rf sw

Rꜥ,w pw ḏs =f

nḥm =k wj m-ꜥ nṯr pwy ṯꜣu̯ bꜣ.pl nsb jw,tj.w ꜥnḫ m ḥwꜣ,yt jr,j kk,wt jm,j snk,t snḏ.w n =f jm,j.w-bꜣg

ptr rf sw

Stš pw

ky-ḏd smꜣ-wr bꜣ pw n Gbb

j Ḫprj ḥr(,j)-jb wjꜣ =f pꜣw,tj ḏ,t =f ḏ,t nḥm =k [...] m-ꜥ nw-n jr,j.w-sjp,w rḏi̯ n =sn nb-r-ḏr ꜣḫ(,w) r jri̯.t zꜣw,t ḫfti̯.pl =f ḏḏ!.yw šꜥ,t m jꜣṯ,w.pl =sn jw,tj.w pri̯.t m zꜣw,t =sn

nn hꜣb{.w} ds.pl jm =j

nn ꜥq =j r jꜣṯ,w.pl =sn

nn hꜣi̯.y =j r-ẖnw nm.w,t =sn

nn ḥmsi̯ =j m-ẖnw ḥꜣd.w =sn

nn jri̯ =tw{t} n =j (j)ḫ,t m nw n bw,t nṯr.pl

ḥr-n,tt jnk swꜣ wꜥb(.w) ḥr(,j)-jb msq,t jni̯.y n =f ms,y m ṯḥn,t jm,j.t Ṯnn,t

ptr rf sw

jr Ḫprj ḥr(,j)-jb wjꜣ =f Rꜥ,w pw ḏs =f

jr nw n jr,j.w-sjp,w Bn,tj pw

ꜣs,t pw

Nb,t-ḥw,t pw

jr nw n bw,t nṯr.pl ḥs pw

[...] pw

jr swꜣ wꜥb ḥr(,j)-jb msq,t Jnp,w pw

jw =f m-sꜣ ꜥfḏ,t n,tj ẖr mẖt,w Wsjr

jr rḏi̯.y n =f ms,yt m ṯḥn,t jm,j.t Ṯnn,t Wsjr pw

ky-ḏd jr ms,yt m ṯḥn,t p,t pw

tꜣ pw

ky-ḏd qrqr.t Šw tꜣ.pl pw m NN-nsw,t

jr ṯḥn,t jr,t-Ḥr,w pw

jr Ṯnn,t ḥꜣ,t n.t Wsjr

qd wj pr =k Jtm,w

snṯi̯ wj ḥw,t =k Rw,tj

pḥrr zp-2 nw

tw{r}j Ḥr,w nṯrj Stš ṯz-pẖr

jy.n =j m tꜣ

jṯi̯.n =j m rd.du =j

jnk Jtm,w

jw =j m nʾ,t =j

ḥꜣ =k rw ḥḏ rʾ pds tp

ḥmi̯ n 〈p〉ḥ,tj =j

ky-ḏd ḥmi̯ =j

jrr! zꜣw,t n mꜣꜣ.ntw =f m zꜣw

jnk ꜣs,t

gmi̯.n =k wj p{ꜣ}zḫ.n =j šnj =j n-ḥr =j tḫtḫ(.w) r wp,t =j

jwr.n =j m ꜣs,t

bnn.n =j m Nb,t-ḥw,t

ꜣs,t dr =s zꜣw,t =j

Nb,t-ḥw,t bḥn =s ẖnn,w =j

nrw =j m-ḫt =j

šfšf,t =j tp-ꜥ.wj =j

qꜥḥ n =〈j〉 ḥḥ.pl rmn.w =sn

pẖr n =j rḫ,yt

ḫbs wnḏw,t ḫftj.w =j

kfꜣ n =j skm.yw rmn.w =sn

rḏi̯ n =j snsn.t bn{r}j,t

qmꜣ n =j jm,j.w H̱r,j-ꜥḥꜣ jm,j.w Jwn,w

nṯr nb ẖr snḏ =j n wr ꜥꜣ n nḏ =j nṯr m-ꜥ sḥwr sw

sti̯ n =j wꜣḏ.pl

ꜥnḫ =j n mrr! =j

jnk Wꜣḏ,yt nb,t wnm.w

s(j)ꜥr =sn n =j ꜥnḏ jm =sn

ptr rf sw

štꜣ.pl jrw ḏḏ! Ḥmn rn n ḥꜣd

Mꜣꜣ jni̯.t =f ḥr-ꜥ rn n qrj

ky-ḏd rn n ṯnm

jr rw ḥḏ rʾ pds tp ḥnn pw n Wsjr

jr pzḫ.n =j šnj =j r-ḥr =j tḫtḫ(.w) r wp,t =j wnn ꜣs,t pw ḥr štꜣ

ꜥḥꜥ,n zjn.n =s šnj =s

jr Wꜣḏ,yt nb,t wnm,w jr,t Rꜥ,w pw

jr (j)ꜥr =sn n =j ꜥnḏ jm =sn wnn zmꜣ,yt Stš pw ḥr tkn jm =sn

ḏr-n,tt tkn pw jm sꜣmm